August 23, 2016
التسويق .. يعني إيه وازاي

ناس كتير بتخلط بين مفهوم التسويق ومفهوم البيع وأنشطة الدعايا والإعلان .. ببساطة البيع هو عملية اقناع العميل بالمنتج أو الخدمة عن طريق توضيح مزايا واهميتها ليه ممكن عن طريق مقابلة العميل أو الاتصال بيه بالتليفون أو الايميل مثلا.

 أما الدعايا والإعلان فبتكون بهدف ان العميل يعرف الشركة ومنتجها وبالتالي يشتري المنتج سواء حالا او في المستقبل.

مفهوم التسويق قايم علي بناء علاقة طويلة المدي مع العميل (يعني مش مجرد ربح في الوقت الحالي من صفقة واحدة) وكمان مش مجرد ربح أو مكسب لكن المستهدف هوا أكبر ربح ممكن، عشان نعمل كدا بمر بمجموعة مراحل:

1) مرحلة التحليل: وفيها بنفهم احتياجات العميل وسلوكه ومستواه وسنه، كمان بندرس المنافسين وأسعارهم وجودتهم ودا فضلا عن تحليل وضع الشركة الداخلي بمعرفة قدراتها المالية وخبرات الفريق وقدراته.

2) مرحلة التخطيط الاستراتيجي: وفيها بنحدد الشريحة المستهدفة وهي اكتر فئة من العملاء مربحة للشركة وفي نفس الوقت تقدر تخدمها، بنحدد الميزة التنافسية اللي هنختلف بيها عن المنافسين ونبدأ نركزها في ذهن العميل مع الوقت.

3) مرحلة البرنامج التسويقي: وفيها بندرس طبيعة المنتج وأنواعه والخدمات الملحقة بيه ، كمان بنحدد السعر وبنحلل هيكل التكاليف بكل تفاصيلها وهامش الربح، والتوزيع او ازاي العميل هيوصلي سواء اونلاين او اوفلاين، الترويج او ازاي هنتواصل مع العميل (سوشيال ميديا – موقع اونلاين – حملات رسايل – اعلانات الشاريع – مطبوعات – ايفنتات – بيع شخصي … او مزيج من دول) ، غير كدا بندرس تجربة العميل نفسها يعني الفريق اللي بيتعامل معاه ومكان الشركة نفسه بتفاصيله وعملية الشراء من اول ما بيركن عربيته برا المحل لحد مايرجع البيت بالمنتج او الخدمة ويجربها.

4) التنفيذ والمتابعة: من غير متابعة وتقييم عن طريق مقارنة الواقع الفعلي بالخطة وتحديد نقاط الضعف ومعرفة سببها وتعديلها والتنفيذ مرة اتينة مش هنقدر نحقق الهدف ولو اتحقق مش هنقدر نحافظ عليه.